Komuna e Klinës ka nisur sot zyrtarisht organizimin e dëgjimeve buxhetore në kuadër të hartimit të projeksioneve për Kornizën Afatmesme Buxhetore për periudhën 2026–2028.
Takimi i parë u mbajt në sallën e konferencave të Komunës së Klinës dhe bashkoi përfaqësuesit institucional me kryetarët e sapozgjedhur të këshillave të fshatrave.
Pjesëmarrës në këtë takim ishin kryetari i Komunës, Prof. Dr. Zenun Elezaj, nënkryetarja Marqe Tanushi-Selmanaj, zyrtarja kryesore financiare, Melihate Behramaj, drejtori i Financave, Enver Berisha, drejtori i Shërbimeve Publike, Qendrim Millaku, si dhe drejtues të tjerë të drejtorive komunale, kryetarët e këshillave të fshatrave dhe media.
Qëllimi kryesor i këtyre dëgjimeve është përfshirja e drejtpërdrejtë e komunitetit në procesin e planifikimit buxhetor, si dhe garantimi i transparencës në shpërndarjen e mjeteve publike për periudhën e ardhshme trevjeçare. Gjatë diskutimeve u vu theks i veçantë te identifikimi i projekteve me prioritet të lartë, të cilat kërkojnë trajtim të menjëhershëm dhe përfshirje në planifikimin buxhetor.
Buxheti u prezantua përmes tabelave të mençura, duke ofruar një pasqyrë të qartë dhe të kuptueshme për të gjithë pjesëmarrësit. Kjo formë e qasjes vizuale synon të rrisë kuptueshmërinë dhe angazhimin qytetar në proceset vendimmarrëse.
Dëgjimet do të vazhdojnë sot edhe në bashkësinë lokale në Poterç të Epërm, si dhe në bashkësinë lokale të Grabanicës.
Ndërsa nga e hëna, më 9 qershor, organizohen dëgjimet e tjera sipas agjendës së bërë publike më herët.
Komuna e Klinës mbetet e përkushtuar për të ndërtuar një buxhet gjithëpërfshirës dhe në përputhje me nevojat dhe prioritetet e qytetarëve.
